باطل کے خلاف حق کی علامت حسینؑ

    

           

باطل کے خلاف حق کی علامت حسینؑ

 

       حضرت امام حسین علیہ السلام  نے اپنے نانا  کے دین کو بچانے کے لئے کربلا کے ریگزاروں میں اپنے لہو سے حق و صداقت کے جو چراغ روشن کئے اس کی لو روز محشر تک زندہ  تابندہ رہے گی۔ امام حسینؑ کی  یہ عظیم قربانی تاریخ اسلام اور تاریخ انسانیت  کا ایک روشن باب ہے۔جس کی مثال روئے زمین پر نہیں ملتی۔باطل کے خلاف حق کی علامت حسینؑ   ہے۔ جب تک سماج کے اندر  ظلم موجود ہے  حسینؑ   زندہ ہیں۔ حضرت امام حسین علیہ السلام نے باطل قوتوں کے مقابلے میں کٹ جانے کا درس دے کر آنے والے  دور میں ظلم و بربریت کے خلاف ایک عظیم درس دیا ہے۔ حضرت امام حسینؑ کا جہاد اس دور کی بے دین  استحصالی قوتوں کے خلاف تھا۔استحصالی قوتیں آج بھی انسانیت کے خلاف برسر پیکار ہیں۔ یہ استحصالی قوتیں حکمرانوں میں بھی ہیں اور معاشرے میں بھی ہیں اور ان کا شکار معاشرے میں پسے ہوئے غریب عوام ہیں۔

           سانحہ کربلا کے بعد  برصغیر کی تمام زبانوں میں کربلا والوں کی عظیم قربانیوں کو تخلیقات کا رنگ دیا گیا۔  ان شعری اصناف جن میں مرثیہ، قصیدہ ، سلام، رباعی، اور مثنوی شامل ہیں میں  امام حسین علیہ السلام  اور ان کے جانثاروں کی قربانیاں نہایت تخلیقی انداز میں بیان کی گئی ہیں۔ ان شعری اصناف کے علاوہ ناولوں، افسانوں، غزلوں، اور نظموں میں بھی کربلا  کے فکر انگیز استعارے ملتے ہیں۔  آج کا  اردو ادب  استحصالی قوتوں کے خلاف کربلا کی علامتوں اور استعاروں سے معمور ہے۔  اردو شاعری میں غزل کے ساتھ ساتھ سلام کو بھی قیام پاکستان کے بعد فروغ  حاصل ہوا۔ ہمارے شعراء کرام نے رسالت ماٰب  میں جہاں خوبصورت نعتیں کہیں وہاں کربلا والوں کی یاد میں صنف سلام کو بھی فروغ دیا۔

           باطل کے خلاف حق کی علامت حسین علیہ السلام   کے  عنوان سے ہم امام عالی مقام علیہ السلام، خاندان رسالتؐ اور ان کے جاں نثارون کو  ہدیہ سلام پیش کرنے کے  لئے کچھ شعراء حضرات کے اشعار شامل کر رہے ہیں جنہوں نے  بارگاہ امام حسین علیہ السلام میں ہدیہ سلام پیش کیا۔   

جب      کسی  مظلوم    نے   ظالم  کو  للکارا   تو سمجھو

بالیقین     اس     نے     لیا    ہو   گا   سہارا     کربلا     کا

ہم قتیل اس عہد کے سارے یزیدوں سے ہیں واقف

سانحہ   ہونے   نہ   دیں   گے    ہم   دوبارہ   کربلا      کا

     ٭قتیل شفائی

سر   دشت   وفا،  اہل وفا   کی   آزمائش  ہے

مگر  یہ  آزمائش  تو   بلا   کی   آزمائش   ہے

وہ ذوق و شوق جس کو کربلا کا نام دیتے ہیں

مجھے  لگتا   ہے  تسلیم   و   رضا  کی آزمائش  ہے

 ٭شہزاد احمد

نام  حسینؑ  لے کے جب اٹھنے  لگا  زمیں سےمیں

بوجھ  مرے  وجود  کے سب  پر  و  بال  ہو  گئے

ایسا   سبق   پڑھا   دیا   اس  نے  کٹا  کے سر ظفر

اہل    زوال   تھے ،   سو،   اہل   کمال   ہو      گئے

٭ظفر اقبال

ابھی   نشانہ  غم  ہائے   بے سبب  ہے حسینؑ

فرات ذہن مسلماں پہ تشنہ لب ہے حسینؑ

جو   زندگی  کے  شب   و  روز   میں  مقید   ہیں

انہیں  خبر  نہیں  تقدیر  روز  و  شب ہے حسینؑ

٭وحید الحسن ہاشمی

پھر   آج    وہ    شدت  پیاس   میں   ہے

مرے وطن کی فضا عجب اک ہراس میں ہے

حسینؑ   تری      تلاش      میں      ہے

 یہ      راہ       بھولا      ہوا          قبیلہ

حسینؑ      تری      تلاش       میں       ہے

٭امجد اسلام امجد

اسی  کا  ذکر جمیل کرنا  اسی کی  سیرت کا باب   پڑھنا

درود  پڑھنا  شہ  زمن  پر  سلام بہر  ثواب  پڑھنا

سکھایا اس نے فرات عہد روا کے ساحل پر حق کی خاطر

فراز  نوک  سناں پہ جا کر فلک سے اتری کتاب پڑھنا

٭حسن عسکری کاظمی

یزیدیت  کے نمائندے   قاتلان   عقیل

وہ   اہل   کوفہ  کہ  خود   شرم شرمسار  آئے

بپا     ہے  مجلس    یاد   حسینؑ   سب   ساتھی

غموں سے چور  یوں آئے کہ اشکبار آئے

٭ڈاکٹر سعادت سعید

دراصل یہ تو کفر و صداقت کی جنگ تھی

پرچم  صداقتوں  کا  اٹھایا ،حسینؑ  نے

شہزاد   روشنی   میں نہائے ہیں دو جہاں

ایسا  بھی   اک   چراغ   جلایا حسینؑ  نے

٭شہزاد جالندھری

انہی   کا    ذکر   ہے  قریہ   بقریہ    شہر  بہ شہر

یزید  وقت  نے چھینا تھا جن سے  اذن کلام

رواں دواں ہے وہ  راوی ہو یا چناب و فرات

جلے   ہوئے   ہیں  مگر کشتگان حق   کے  خیام

٭ستار سید

نا  کبھی  راستہ  نا  کبھی  راہبر  بدلتی  ہے

ہماری  ناؤ  حسینیؑ   ہوا   سے  چلتی  ہے

اگر حسینؑ  کی الفت ہو قلب میں آصف

محبتوں   کی   فضا   ساتھ   ساتھ   چلتی   ہے

٭پیر آصف علی گیلانی

تاریخ   مثال   ایسی   ڈھونڈھ   کے  لائے

سر تن سے جدا بھی ہو مگر موت نہ آئے

سوچوں میں کبھی صبر و رضا کے جو معانی

اک نام، حسینؑ ابن علیؑ ذہن میں آئے

٭اعزاز احمد آذر

اے علیؑ کے لاڈلے، اے فاطمہؑ کے لخت جاں

تیرے غم میں خون روتے ہیں زمین و آسماں

وہ جگر پارے بھی دین حق پہ قربان کر دئیے

دیکھ کر ہوتا تھا  جن پر   چاند  تاروں   کا  گماں

٭احمد عقیل روبی

جیسے  ابھی   ہوا  ہو  یہ  ایسا  سانحہ ہے

ہم بھی  نئے  نئے  ہیں غم بھی نیا  نیا ہے

یاد آئیں جب بھی پیاس آل نبیؐ کی تابش

دل بہتے  پانیوں کو حسرت  سے  دیکھتا ہے

٭عباس تابش

جو کائنات میں سلطان بحر و بر کا ہے

وہ ایک فرد ہمارے نبیؐ کے گھر کا ہے

جو کربلا میں اگا تھا سلگتے موسم  میں

بلا کی دھوپ میں سایا اسی  شجر کا ہے

٭عاقل کاظمی

حقیقت  ازلی  وہ حسینؑ  ابن  علیؑ

ہاشمی  مطلبی   وہ  حسینؑ  ابن  علیؑ

شب سیاہ میں اک خاور فلک آثار

وہ  روشنی  جلی  وہ حسینؑ  ابن علیؑ

٭اختر ہاشمی

یم    جبر    تھا     اور     دم     صبر  تھا

عجب   معرکہ     کربلا     میں    ہوا

یہاں تیرے  غم میں سمندر بہے

وہاں    ایک   قطرہ    نہ   تجھ   کو    ملا

٭احمد شریف

دل  sہے غم  حسینؑ  کی  دولت سے مطمئن

دل   ہے       میرا     خزینہ     اسرار        کربلا

لاکھوں سلام اے مرے مولائے تشنہ کام

لاکھوں       درود     قافلہ      سالار     کربلا

٭کرامت بخاری

دنیا   رکھے   گی   یاد   شجاعت   حسینؑ    کی

بنیاد   حق   بنی   ہے    شہادت   حسینؑ    کی

اس   کو   نہیں   میں   جوش   مسلمان   مانتا

دل میں نہیں ہے  جس کے محبت حسینؑ کی

٭اے جی جوش

میرا جو بھی ہے اس کے وسیلے سے ہے

میری  نسبت  علیؑ  کے  قبیلے  سے  ہے

جب بھی مشکل پڑے میں پکاروں اسے

ساری  برکت  اسی  ایک  حیلے سے ہے

٭پرویز احمد ہاشمی

اہل  کوثر  کا  گھرانہ  چاہیئے

پانیوں کو اک  فسانہ  چاہیئے

نام لے کر کربلا کی دھول کا

راستوں   کو   آزمانا     چاہیئے

٭اکرام عارفی

بلا   لحاظ  گروہ   مسلک تیرا  عمل  فخر  آدمیت

امامتوں  کے نگین  تجھ کو قیادتوں  کا  سلام پہنچے

نواسہ مصطفیٰ نے تکمیل عزم خواب خلیل کی ہے

تو وارث مرسلین تجھ کو رسالتوں  کا سلام  پہنچے

٭عقیلہ کاظمی

ابن علیؑ سے نسبت ہر دور میں رہے گی

ہر دور پہ یہ حکومت ہر دور میں رہے گی

آل نبیؑ نے سب پر ثابت یہ کر دیا ہے

اسلام اک حقیقت ہر دور میں رہے گی

٭عابد حسین عابد

حسین ؑ اک  کردار  ہے عمل  کا  ایثار کا

سر دے کر اونچا کر دیا سر حیدر کرارؑ کا

خیر العمل کی داستاں لکھ کر حسینؑ نے

انکار کو معنی دیئے بدلا مفہوم اقرار کا

٭سیدہ عارفہ بصیر

مانوس  ہوں اتنا  ترے کربل کی  زمیں سے

میں دفن کہیں ہوں مگر اٹھوں گا وہیں سے

بیعت   کے   طلب   گار  کو   یہ   یاد   رہے گا

زندہ   ہیں  حسینؑ  ابن  علیؑ  ایک نہیں  ہے

٭ حسن رضوی

Read More:زمین کربلا اور شہید کربلا