ہدیہ سلام مظلوم کربلا

 ہدیہ سلام مظلوم کربلا

  سلام

 دریا      چشم    سے     کیا    کیا گزرتا  جا  رہا  ہے 

مسلسل  درد  کا  صحرا   گزرتا  جا  رہا  ہے

ہمیں معلوم ہے کن منزلوں کو جا رہے ہیں

کہ ہم ٹھہرے بھی تو رستہ گزرتا جا رہا ہے

ہمیں جلتے ہوئے خیمے دکھائی دے رہے ہیں

نظر  سے  آگ  کا  دریا  گزر تا  جا  رہا  ہے

مدینہ چھوڑ کر آئے تھے ہم کو فے کی جانب

سر  کرب  و  بلا  کیا   گیا   گزرتا  جا  رہا  ہے

ادھر  بھی  دور  ہوتا  جا رہا  ہے  قریہ صبح

ادھر  بھی  شام  کا  سایہ  گزرتا  جا رہا ہے

کوئی حر سے مسلسل کہہ رہا ہے جاگ بھی جا

تیری  تقدیر  کا  لمحہ  گزرتا  جا  رہا     ہے

کہو قاتل سے اب تو سر قلم کردے ہمارا

ہمارا   آخری   سجدہ  گزرتا  جا  رہا   ہے

گلے میں طوق، ہاتھوں میں رسن اور پابہ زنجیر

سفر  کا   بیمار  اچھا  گزرتا  جا   رہا    ہے

یزید عصر  کو  دربار  میں  رسوا  کریں  گے

چلو  شوکت  سخن  ورثہ  گزرتا  جا  رہا  ہے

شوکت ہاشمی

شام الم کا منظر

اب کے اس باغ میں وہ  رنگ خزاں دیکھو گے

نہ اڑے  گا  کوئی  شعلہ نہ  دھواں  دیکھو گے

اب جو  اوروں  پہ  چمکتا  ہے تو چپ رہتے ہو

اسی  خنجر    کو  قریب  رگ  جاں  دیکھو  گے

جیسے ممکن  ہو  بچا  لو یہ  اجڑتے  ہوئے شہر

پھر  نہ  یہ رنگ نہ چہرے نہ مکاں دیکھو گے

جانے  والو    چمن  دل  کی  زیارت  کر    لو

اب کے لوٹو گے تو کچھ بھی نہ یہاں دیکھو گے

دیدنی       ہے   شفق   شام   الم   کا         منظر

پھر یہ بجھتے ہوئے چہرے بھی کہاں دیکھو گے

 احمد مشتاق

کچھ ایسے چار طرف قہر کے سفر میں تھا

گیا جہاں بھی کسی ظلم کے نگر میں تھا

حصار   جبر میں ہر تار زندگی  تھا اسیر

کہ ہر جہاز نفس جور کے بھنور میں تھا

خزاں کے مارے یوں گلستان کو کاٹ لیا

کہ زہر ظلم رواں ہر رگ شجر میں تھا

تھا  آفتاب یقین کفر کے اندھیرے میں

کہ جیسے تیر کوئی رات  کے چکر میں تھا

وہ دن بھی آئے جب سبز کارواں نمو

بچھڑ کے سائے سے ایک سرخ دوپہر میں تھا

رہن ساحل  منزل ازل سے تھا جو کبھی

جو دن پھرے تو وہ گرداب ، رہ گزر میں تھا

اڑا گئی اسے آخر جسے جھکا نہ سکی

وہ ایک نخل وفا جو ہوا کے سر میں تھا

پڑا  ادھر جو کوئی عکس دید ڈوب گیا

وہ آب درد میرے چشمہ نظر میں تھا

بکھر گئے تھے سبھی برگ بے نوا قدرت

ہوا کا زور  بپا یوں شجر شجر میں تھا

تھا جس کا ذکر بھی ممنوع شہر بھر میں تھا

نکھر گیا مرا فن ، میری شاعری قدرت

کہ اس کا فیض جو شامل مرے ہنر میں تھا

سید یاسین قدرت

پھر میداں میں آ

کتنے  جگ   بیتے  غم  شبیرؑ  ہے  تازہ   ابھی

اس  کی  عظمت  کا  نہیں  دنیا  کو اندازہ ابھی

اللہ  اللہ       رفعت    خون   شہیدان    وفا

چرخ  نیلی  فام  کے چہرے  کا  ہے   غازہ  ابھی

سر کٹا  دینا ، کبھی  جھکنا     نہ  آگے  ظلم   کے

کربلا  کے  دشت  سے  آتا  ہے  آوازہ   ابھی

کیا  بتاؤں   راکب    نوک  سناں  کی   یاد  میں

اشک خون بہتے ہیں ذخم دل بھی ہے تازہ ابھی

اے  حسینؑ ابن علیؑ اک بار پھر میدان میں آ

منتشر     ہے   ملت   بیضا    کا  شیرازہ   ابھی

دو جہاں کی نعمتیں مجذوب بنتی ہیں یہاں

ہے کھلا آل نبیؐ کے گھر کا دروازہ ابھی

مجذوب چشتی

دجلوں کی دہلیز

تاریخوں کی معرفتوں ، مقسوموں کے

طشتریوں میں سر تھے عجب مظلوموں کے

کچھ قبروں کی خاک بھی پاک طہارت میں

کچھ محلوں کے  بیچ  بسیرے  بوموں کے

میدان میں گھوڑے خالی اسواروں  سے

نیزوں پر سب صادق عربوں روموں کے

تجھ پر لاکھ سلام اے کربل تیرے نام

بازو مخدوموں کے، سر معصوموں کے

دجلوں  کی دہلیز   پہ  لاوارث   لاشیں

دور خزانوں سے مدفن مرحوموں کے

مال  غنیمت  ، قیمت  ہر مجبوری  کی

زیور اترے کبراؤں، کلظوموں کے

برسوں کے بسرام میں ماتم، مقتل، بین

قرنوں کے کہرام میں شور، ہجوموں کے

تیر  جنازوں  پر،     یلغار  نمازوں      پر

یہ   قصے   یہ   حصے   ان  محروموں  کے

ناصر شہزاد