بڑھاپے میں جلد کو کیسے جوان رکھا جاسکتا ہے
بچپن میں ہماری جلد بہت نرم و نازک ہوتی ہے۔ جوانی میں بھی خوبصورت اور توانا ہوتی ہے۔ پھر جوں جوں بڑھاپے کی طرف قدم بڑھتے ہیں جلد اور شکل بھی بدلنا شروع ہو جاتی ہے۔ جلد پر جھریاں پڑنے لگتی ہیں۔ بڑھاپے کے آثار جسم کے بعض حصوں پر نمایاں ہونا شروع ہو جاتے ہیں۔ بعض لوگوں کی جلد پر سیاہ دھبے نمودار ہوتے ہیں۔ یہ دھبے جنہیں عمر کے دھبے بھی کہتے ہیں، جسم کے کسی بھی حصہ پر ظاہر ہو سکتے ہیں۔ یہ دھبے ہائپر پگمنٹیشن کی ایک شکل ہیں ۔ جلد کے اندر قدرتی روغن جسے میلانین کہتے ہیں، کی زیادتی کی وجہ سے سیاہ دھبے اور ناہموار رنگت پیدا ہوتی ہے۔ یہ سیاہ دھبے یا ناہموار رنگت جلد کے لئے خطرناک نہیں ہے۔
یہ دھبے ایک دوسرے سے گہرے ہوتے ہیں ۔ ایک یا زیادہ دھبوں کے گرد ایک سیاہ
حلقہ بھی بنتا ہے۔ یہ دھبے بڑھتے رہتے ہیں اور سرخی مائل ہونے لگتے ہیں۔
ان دھبوں کو ختم کرنے اور اپنی جلد کو جھریوں سے بچانے کے لئے بہت آسان سا حل ہے۔ زیادہ تردد کرنے کی ضرورت نہیں ہے۔ یہ عام سی چیزیں ہیں جو ہر گھر میں پائی جاتی ہیں۔ اس میں ایک کا استعمال روزانہ ہی ہوتا ہے۔ پیاز اور سیب کا سرکہ بہت آسانی سے مل جاتے ہیں۔ پیاز کا رس جلد کے دھبوں کو ختم کرتا ہے اور سیب کا سرکہ جلد کو تر و تازہ و جوان رکھتا ہے۔ ان دونوں شفاء بخش گھریلو اشیاء سے اپنی جلد کی حفاظت کر سکتے ہیں۔
پیاز کو چھیل کر کاٹ کر گودے کو بلینڈ کریں۔ گودے کو سوتی کپڑے یا باریک چھلنی میں ڈال کر اس میں سے رس نکال لیں۔ پیاز کے رس کو سیب کے سرکہ میں ملا کر سیاہ دھبوں پر لگائیں۔ اسے روزانہ لگائیں۔ چند ہفتوں بعد ہی دیکھیں گے کہ یہ سیاہ دھبے ہلکے ہونا شروع ہو گئے ہیں۔ دھبے کم ہونے کے ساتھ ساتھ جلد میں بھی تازگی آ جاتی ہے۔ جھریاں بھی ختم ہونا شروع ہوتی ہیں۔